Стереотипните очекувања на една заедница не се пречка за детскиот сон и амбицијата на едно момче. Таква е приказната на младиот Анди Исмаили од Гостивар, борец за своите права, но и исклучително талентиран танчер кој ги совладува предрасудите и осудувањата на луѓето околу него, кои му велат дека „на момче не му личи да танцува“, му довикуваат навреди и го исмеваат. А тој, никако да застане, туку наместо тоа патува низ светот и освојува признанија, награди, победува на фестивали и ги руши стереотипите со секој изминат ден.
За било кој 15-годишник, признанието дека е најдобар во светот во било која вештина е огромна работа која се слави до крајот на животот, но Анди може да се пофали со 4 светски шампионски титули во модерен балет и вели дека нема намера да застане набрзо. А колку што овој успех е негов и личен, подеднакво толку претставува гордост и на целата држава, која сега знае дека произвела извонредно вешт и посветен танчер.
Анди танцува модерен танц од 2017 година и ваквиот начин на креативно изразување е неговата животна страст. Тој исто така танцува џез и модерен балет, а вели дека најмногу ужива во музиката на Били Ајлиш. Но, и покрај меѓународното признание на Анди и неговиот неспорен талент, неговиот избор да го прифати модерниот танц - патека многу ретко избрана од момчињата - е погрешно разбрана во неговиот роден град. Спојот на монументалниот глобален успех и неприфаќањето од страната на заедницата, па дури и малтретирањето од страна на врсниците, само го нагласува општествениот парадокс, кој силно се бориме да го отстраниме од заедницата.
Меѓутоа, приказната на Анди Исмаили не е само предупредување дека во нашата заедница сѐ уште постојат предрасуди кои треба да ги надминеме, туку таа е и доказ дека убавите приказни во заедницата постојат, но треба да направиме место за тие да бидат видени. Упорноста и истрајноста на Анди треба да ни бидат поттик дека треба да се бориме за она што го сакаме и дека на предизвиците треба да им погледнеме право во очи за да ги надминеме. За среќа, тој има поддршка од неговото семејство, тренерите по танц, неговите другари, но и од јавноста која навива за него на секој следен натпревар и верно го следи на социјалните мрежи.
Додека стоиме со Анди и безброј други кои секојдневно се соочуваат со слични битки, вредно е да се потсетиме колку е важно да ги прифатиме и поддржиме луѓето околу нас, и на тој начин да ја создадеме заедницата во која сакаме да живееме. Овој приказна нè предизвикува да се соочиме со малтретирањето, особено врз младите таленти и да се поттикне средина во која секоја страст, без разлика колку е неконвенционална, е исполнета со охрабрување. Затоа, танцот на Анди станува танц на пркос против предрасудите и танц на надеж за поинклузивен свет.
Мотивирани од иницијативата „Да направиме место за вистински да се поврземе“ на Македонски Телеком, во рубриката „Добри вести“ на Точка ќе споделуваме приказни кои го осветлуваат позитивното, надежното и инспиративното. Да #НаправимеМесто за посветло утре, за повеќе разбирање, емпатија и блискост.
